Jakten på turmagien, ved Alexander Read

Hareid kommune og Seinsommarfest samarbeider om å sette friluftsliv på agendaen.

At 2025 er friluftslivets år vil sette sitt preg på årets Barnefestival under Seinsommarfest. Vi inviterer til eit turmagisk foredrag for store og små med Alexander Read frå «Mina og meg» på Barnefestivalen laurdag 9. august. Barnefestivalen er ein del av Seinsommarfest.

Alexander er kanskje betre kjend som «Daddy» frå TV2-seriane «Mina og meg», samt for sitt samfunns-engasjement som friluftsrettleiar og ekspedisjonsfarar og formidlar av korte og lange turar i norsk natur.

Saman har Alexander, Mina og veslesyster Lilje vandra i fjellet på kryss og tvers i fleire år, sommar og vinter, i jakt på turmagien. For det skjer nemleg noko heilt spesielt når fjellguiden i front er ei lita jente på 2, 4 eller 7 år.

Alexander er brennande engasjert i å bryte ned terskelen slik at barn, unge og deira foreldre finn vegen ut i naturen. Han jobbar som friluftsrettleiar med naturen som terapeutisk metode for barn og familiar i sårbare livssituasjonar gjennom Blå Kors og sin eigen organisasjon Turmagi. TV-seriane hans er nominert til Gullruten to gangar, og dottera hans, Mina (7), er kåra til «Årets Villmarking 2019» og «Årets Fjellgeit 2021». Det er spesielt menneskemøta som skapast med naturen, og moglegheitene til å bygge livskraftige, heile liv som Alexander er opptatt av å formidle.

Vi gler oss til dette spennande foredraget! I etterkant blir det aktivitetar med speidarane i parken rett ved sidan av.

Hareid kommune har fått tilskot til dette arrangementet frå Møre og Romsdal fylkeskommune.