Fonn - Gallen - Tungestølen

Bli med på ei klassisk turhelg over Jostedalsbreen!
Denne tradisjonsrike turen er endeleg tilbake etter nokre år ute av programmet, og byr på varierte naturopplevingar, sosialt samver og ei sterk kjensle av meistring.

Helga 11.–12. juli arrangerer IST turen over Jostedalsbreen, frå Fonn i Stardalen til Tungestølen i Luster kommune. Turhelga startar med felles busstransport frå Festplassen i Førde laurdag kl. 07.00, med moglegheit for påstiging på Skei. Bussen køyrer oss til Fonn, som er startpunkt for fotturen over breen.

Frå Fonn går vi i roleg tempo før ei noko bratt stigning opp mot Gallen. Herifrå nærmar vi oss brekanten, der vi knyter oss inn i taulag og tek til på brekryssinga. Etter om lag 2–3 timar på breen kjem vi ned til Midtnovi, før ei bratt nedstiging til Langedalen. Den siste delen av turen går i lettare terreng fram til Tungestølen.

Vel framme på Tungestølen vert det, tradisjonen tru, god mat, sosialt samver og overnatting på deira betente anlegg.

Turen er noko krevjande, med ei samla gangtid på om lag 10–11 timar, og passar for deltakarar i god fysisk form.

Søndag etter frukost kan ein velje mellom fleire alternativ:

• fottur gjennom Snauedalen til Fjærland

• tur til Austerdalsbreen

• eller ei roleg stund på Tungestølen fram til bussen returnerer til Sunnfjord

Pris: Medlem / ikkje-medlem. I prisen er inkludert breføring, transport, overnatting og middag.