Kort vårskitur m/ bålkos på Valdresflye / Garliområdet

Bli med på ein kort ski- og båltur i snaufjellet.

Denne turen skulle vore arrangert før påske, men på grunn av mildveret som har komme, flyttar vi turen til snaufjell der vi håpar det blir betre skiføre enn lengre nede i terrenget.

Dette blir ein tur der det viktigaste blir å samla oss kring bålet og eta og kosa oss på ein lun plass. Først og fremst ønskjer vi å leggja turen til Valdresflye. Blir ver- og føreforholda ueigna, legg vi turen til området ved Garli nord for Beitostølen eller til ein annan høveleg stad i området.

 Ta med deg:

1. Ski: fjellski med fellar eller vanlege ski. 
2. Sitjeunderlag.
3. Mat som kan steikjast / varmast på bålet
4. Godt med anna niste og varm drikke.
5. Ta med snøspade om du har det. Eignar seg til å grava sitjeplassar med.
6. Litt tørr ved til bål.
7. Kle deg for ein dag i snaufjellet: anorakk / dunjakke, ekstra genser, varme vottar, skjerf / hals m.m.

Frammøte på tidlegare Shell på Fagernes kl. 11.00. Dei som vil møta nord for Fagernes, avtalar dette med turleiar på tlf. 48142002 ved påmelding. På Valdresflye parkerer vi i ei av parkeringslommene langs Fv 51 eller inne på parkeringsplassen ved kafeen der. Legg vi turen til Garli, parkerer vi på parkeringsplassen på oppsida av fylkesvegen. Det er parkeringsavgift der.

Turen kan bli avlyst, flytta eller utsett alt etter ver- og snøforholda.

Deltakarane går på eige ansvar, men vi turleiarar vil gjera turen så trygg som mogeleg. Dette er ein fellestur med ein turleiar fremst og ein turleiar til slutt. 

Påmelding digitalt eller på sms til 48142002 seinast 07.04.26 kl. 18.00