Seniortur - Hildalsstølen, Odda

Det er frammøte kl. 09.00 på parkeringsplassen ovanfor kaien i Rosendal.
Etter ei kort orientering om turen og oppfylling av bilane i Rosendal, køyrer vi innover fjorden til Odda og svingar til høgre ved rådhuset og sørover på Rv 13.

KØYRETUREN FRÅ ODDA
Like etter sørenden av Sandvinsvatnet kjem vi til Hildal med 8-9 bruk som har stølane sine 6-700 meter over havet, innover frå eggja, mot Hardangervidda, på austsida (venstresida) av dalen. (På høgre sida ser vi den vakre Vefoss som kjem frå fjella under Folgefonna.)

I det vi passerer Vefoss, ser vi den den gamle stølsvegen oppover Hildalsberget mot stølane som vi skal vitja. Dette var også eit parti av hovudvegen (kløvjevegen) mellom Odda og Røldal fram mot slutten av 1800-talet.
Vi køyrer vidare sørover Rv 13, den nye vegen frå 1860-70-talet, som fører oss til krysset ved Steinaberg bru. Der køyrer vi beint fram i retning Reinsnos og forlet derved Rv 13. Etter få kilometer tek vi av frå denne vegen ved garden Låte (som har gjeve namn til Låtefossen.)
No køyrer vi nordover langs eggjakanten på Hengsvegen for å koma tilbake til stølsvegen frå gardane på Hildal. Langs  denne grusvegen passerer vi to fjellgardar, Heng og Brekke. Vi har såleis "juksa litt" og startar fotturen mot stølen der terrenget har flata ut innover den vide stølsdalen.

VANDRINGA
Vårt turmål er heimste  Hildalsstølen, og der vart det frå seint på 1960-talet, i noko avstand frå dei gamle stølshusa, selt mange hyttetomter, og  vi kunne no ha køyrt bil heilt til støls. Men vi parkerer på høgda over garden Brekke, ved Skorvene, og tek den gamle stølsvegen som no ligg der for seg sjølv, i god avstand frå hytter og bilveg, slik han har lege i fleire hundre år, langs sørsida av stølselva som kjem heilt frå fjellvatna inne på Hardangervidda, sørvest for Trolltunga.

Sjølve fotturen er ein lettgått rundtur i nokså flatt lende. (ca. 100 m høgdeskilnad mellom start og turmål.) Stien inn mot stølen er gamal  buføreveg, men det kan vera nokre korte, våte parti. Tre, fire svært korte motbakkar er ikkje verre enn at turen ligg på grensa til graderinga "lett".
Vi kjem inn på bilvegen att nokre få hundre meter før sjølve stølen, og ved stølshusa tek vi hovudstoppen. Minst ein halv time viss ikkje veret er heilt ulagleg.

Tilbaketuren går på ein annan god sti i ei sløyfe nordvestover, først mot ein annan støl, Gjone, (gjo: djup, trong kløft) ned mot eggjakanten over Hildal, der vi finn att restar av den gamle taubanen ned mot gardane i bygda. Her er fint utsyn mot deler av Oddadalen og fjella i vest mot Folgefonna.
Tilbake mot området for turstart går vi først på litt av same sti, før vi på slutten kjem inn på bilvegen mot bilane att.

HUSK: Fjellsko, det er nokre våte parti !  

VEL MØTT, turen er open for alle, her er det ingen som spør om alder...  

OBS: Ved fullført påmelding får du stadfesta deltakinga di pr SMS og e-post. Dersom du ikkje får slik stadfesting, må du prøva påmelding på nytt. 
Ta kontakt med ein av turleiarane dersom du har problem med påmeldinga.

• Frammøte:   Kl. 09.00 på parkeringsplassen ovanfor kaien i Rosendal
• Turkarakter: MIDDELS 
• Turavgift:      Ingen, men deltakarane må sjølve dekka transporten til/frå startpunktet for vandringa.
• Turleiarar:    Hermund Fenne (917 03488), Helen Sandvik Røssland (993 59929) og Jan Martin Skaaluren (917 26614)
• Vandringa:
  • * Distanse:            5-6 km tur/retur (delvis rundtur)
  • * Høgdeskilnad:  100 meter
  • * Tidsbruk:            Ca. 3 timar, pausar kjem i tillegg