Sjønær Festival - Festivalen over og under havet

SJØNÆR er ein inkluderande, frivilligdriven festival som blir arrangert på den vakre øya Runde på Sunnmørskysten. Festivalen såg dagens lys i 2022 og går no inn i sitt fjerde år. Målet er å feire, utfordre og skape glede rundt livet ved havet – gjennom aktivitetar, naturformidling, matopplevingar og kulturprogram for både store og små. SJØNÆR har raskt vorte eit samlingspunkt for menneske frå både nærmiljøet og tilreisande som ønskjer ei ekte oppleving i spektakulære omgjevnader, med havet som ramme og drivkraft.

Festivalen har som visjon å skape ei sterkare tilknyting til havet og naturen – både fysisk og emosjonelt. Ved å tilby lavterskel vassaktivitetar som fridykking, kajakkpadling, SUP og fjøresafari, legg vi til rette for meistring og oppdaging i naturen, på deltakarane sine eigne premiss. I tillegg byr vi på kulturinnslag, kunstutstillingar, samtalar og lokalmat – alt forankra i ei oppleving av samhald og respekt for naturen.

Søndagsmoro, eller "Sunday Funday", er eit viktig høgdepunkt i festivalprogrammet. Her får born, ungdom og familiar delta i gratis aktivitetar og nyte måltid saman, i trygge og inkluderande ramar. Dette arrangementet har lågast mogleg terskel, og har som formål å styrke både helse og fellesskap – og å skape minner som varer.

Festivalen skjer i tett samarbeid med lokale aktørar, lag og frivillige – som mellom anna Opplev Runde AS, Njord Freediver, Herøy Dykkerklubb, Herøy Kajakklubb og Naturbruk-linja på Herøy vidaregåande. Saman skaper vi ei levande festivaloppleving, med fokus på bærekraft, engasjement og medmenneskelegheit.

SJØNÆR handlar om å kome tettare på havet – både fysisk og følelsesmessig. Om å lære, leike og leve – saman.