Sognefjorden panorama! Fottur frå Avsneset, over Fløyen og Blåfjellet, til Indre Torvund

Bli med på fotturen Sognefjorden Panorama søndag 8. juni.

Dette er ein tur som byr på storslagen utsikt over verdas lengste fjord.

Vi møtest på parkeringa på Indre Torvund, på E39 mellom Vadheim og Lavik. Køyr av på E39 der det står gult skilt som viser veg til Torvund (første avkøyring til høgre etter/vest for Noreviktunnelen). Frammøte på Indre Torvund seinast klokka 09.00.

Her organiserer vi oss slik at vi kan setje igjen nokre bilar, før vi køyrer nokre kilometer innover fjorden igjen til Avsnes (aust for Norevik, langs gamle E39).

Frå Avsnes går vi opp til Fløyen (764 moh.). Oppstigninga er bratt, men heile vegen opp kan du nyte utsikta, før vi kjem opp til turens første topp der dagens kanskje mest spektuklære utsikt møter oss. Herifrå ser du også rett ned i Vadheimsfjorden og til Vadheim, bygda inst i fjorden.

Deretter set vi kursen vestover. Neste topp er Hatlelifjell (781 moh.), før vi går vidare til Duken (støl). Vi avsluttar med Blåfjell (719 moh.) før vi går ned att til bilane på Indre Torvund.

Turen byr på storslagen utsikt til fjorden, mot havet og fjelltoppar i både Sogn og Sunnfjord. Vi ser mellom anna Storehesten og Blegja i nord, fjella i Stølsheimen i sør, Brosviksåta i Gulen og Lihesten i Hyllestad i vest og innover mot Rambera, Nummestolane og Fresvikbreen i Vik i aust.

Turen går i relativt lettgått fjellterreng, men den er lang. Vi reknar med å bruke ni til ti timar. Turen krev at du er i god fysisk form og van med å gå lange fjellturar i kupert terreng med ryggsekk. Det er mogleg å etterfylle vatn undervegs, men du må ta med drikke for dei første to-tre timane, godt med niste og ekstra klede etter verforholda.

Arrangementet er gratis, men krev påmelding. Siste frist for påmelding er laurdag 7. juni kl. 15.00.

Turleiar er Anita Taftø (tlf. 993 12 587).