Tysdagstur til Hetleegga (Rundenova)

Hetlegga (Rundenova) 904 moh. er nabotopp til Venevassegga (1023) i sør og Drøsinga (1086) i nordvest, sør for indre Holsen. Lokalt kallar vi toppen Hetlegga. Turen startar frå P-plassen ved Fv 613 på Rørvikfjellet der turleiar møter. Første halvdel av turen følgjer vi den nymerka T-ruta til Venevassegga til stidelet ved myra etter Svartenova. Her går vi rett fram til høgre for myra på tydeleg sti til Jakobskaret, og vidare på god og lett merka sti i jamn stigning på nordsida av fjellpartiet, heile tida med utsikt til austre del av Holsen og innover Haukedalen. Frå den unge varden på toppen ser vi m.a. Viksdalsvatnet, Haukedalsvatnet, Holsavatnet og kjende fjell både i aust og vest. Vi returnerer same vegen, men det er kort avstand frå varden til T-ruta på høgda over Hetladalen dersom turfølgjet helst vil returnere der. Samla turtid er 3-4 timar med pausar.

Samordna avreise frå Laksen på Festplassen i Førde kl 10.00. Ev oppmøte ved turstart etter avtale med turleiar. 

Passasjerane betaler kr 50 til sjåfør for turar inntil 40 km kvar veg (80 km tur/retur). Ta omsyn til og juster ev for bompengar/parkeringsavgift. For turar på over 40 km kvar veg (over 80 km tur/retur) vert betalinga kr 75-100 alt etter lengde. For særleg lange turar vart det avtalt eigen sats. 

IST legg DNT sine generelle vilkår for deltaking på fellesturar til grunn.